細眉細眼的麻煩

話哂都住喺第二個國家,德國的日常生活文化總會跟香港有點不同,一些細眉細眼的麻煩事,不至於令你抓狂,但絕對令你的工作假期感到非常不爽。

除非你扮鄭伊健,否則一個男人一年最少都要剪返3/5/7次頭髮。一早已聽聞西方人不懂剪東方髮質,但都估不到堂堂國際大都會柏林的年輕人理髮師,一個唔該,「咔」一聲就平剪了我pat蔭!還加句「oh very nice~」小弟的髮型從未有一刻和薯仔如此接近,直情以為去了傳說中的理髮店「彌敦道9號」!仲夠膽收我30€咁貴!其他亞洲朋友在德國剪髮,除非自己剪,否則都是鎩羽而歸。以為橫死掂死,慳錢搵最平既土耳其理髮店?但剪完會真係想死架。貴的,剪不好 ; 平的,更恐怖! 在這以「實際為上」的德國社會要剪髮,除非找到日本人開的髮型屋,否則都是自求多福‧‧‧‧‧‧

臨離開前才找到的日本人髮型屋@柏林‧Hufelandstrasse臨離開前才找到的日本人髮型屋@柏林‧Hufelandstrasse

中國人點都要有米落肚,但邊有電飯煲呀?唔係個個都有用明火煲飯唔燶既技術。咁點?超市有一種方便米,包裝有細孔,成包放入滾水烚15分鐘食得。無錯,係烚,所以成碗飯都係水滴滴,而且又粉又無咬口,只可以用來止一止思鄉病,是飯桶一族的悲劇。

滾水撈飯滾水撈飯

星期日絕對係香港打工仔shopping既良機!在德國,算罷啦,死城一樣呀,因為法例規定公司及零售店舖星期日開門要付extra tax—所以一到星期日就什麼也做不到,最慘係超市都唔開呀!如果星期六唔記得買定聽日餸,就乖乖地奉獻銀兩出街食啦。如果熟路的話,或者會有一兩間超市或士多營業,但都係會好貴‧‧‧‧‧‧

柏林少數星期日仍營業的超市@Zoologischer Garten,當我們得知此事時,感覺十足哥倫布發現新大陸,又似茫茫大海中找到枯木!柏林少數星期日仍營業的超市@Zoologischer Garten,當我們得知此事時,感覺十足哥倫布發現新大陸,又似茫茫大海中找到枯木!

其實仲有好多麻煩瑣事,如網上預約只有德文、tap water水積太多要成日抹、難搵新鮮魚食、無通宵車、不能周街截的士等等等等。不是在抱怨,只是異地生活習慣的不同,遇上此等事時多少會想一下「香港真係好呀~」,但當你開始覺得everything no problem時,恭喜你,你已經係德國人了~

看完後,好想立即去德國工作假期?

詳情參閱:http://whs.esdlife.com/chi/ger_main.asp

德國
人氣文章關於...
秘境之行始於問 工作假期後的Working Day 人離鄉賤 細眉細眼的麻煩 同住難                     
Priscilla Ng
瘋人鋒語 - 30前80後的德國工作假期
鋒Garcia

高考英文Fail的80後中文教師,30歲限期前獨自跑到德國工作假期。 少少working,多多holiday,德文不懂,英文不行,僥倖一年後仍然生存。其間遊遍歐洲29國家共過百城市,記錄於網誌《瘋人鋒語 - 30前80後的德國工作假期》,仍懶惰地持續更新中。
Facebook 粉絲專頁
博客